بابر اعظم کا ہوم گراونڈ پر فائنل کھیلنے کا خواب ادھورا رہ گیا:

لاہور قلندرز مسلسل دوسرے سال پی-ایس-ایل فائنل میں پہنچ گیا، طاہر بیگ کی نصف سنچری، بلنگز اور سکندر رضا کی عمدہ باریاں:-

لاہور:- ( 17 مارچ 2023ء ) پاکستان سپرلیگ (پی-ایس-ایل) کے دوسرے ایلیمنیٹر میں لاہور قلندرز نے پشاور زلمی کو 4 وکٹوں سے ہرا کر فائنل کے لیے کوالیفائی کرلیا۔ قذافی سٹیڈیم ،لاہور میں کھیلے جارہے پی ایس ایل کے دوسرے ایلیمنیٹر میں پشاور زلمی کے کپتان بابراعظم نے لاہور قلندرز کے خلاف ٹاس جیت کر پہلے خود بیٹنگ کا فیصلہ کیا.

پشاور زلمی کے آوٹ ہونے والے بیٹر صائم ایوب تھے، جو دوسرے اوور کی تیسری گیند پر بولڈ ہوگئے۔ 5 گیندوں پر 9 رنز بنانے والے صائم ایوب کو زمان خان نے بولڈ کیا۔ دوسری وکٹ پر بابر اعظم اور محمد حارث نے 89 رنز کی شراکت قائم کی۔ بابر اعظم نے اس دوران پی ایس ایل میں 500 سے زائد رنز بنانے کے ساتھ محمد رضوان سے ایونٹ کے دوران زیادہ رنز بنانیکا اعزاز بھی چھین لیا۔

بابر اعظم 36 گیندوں پر 42 رنز بناکر پویلین لوٹ گئے، انہوں نے اس دوران 7 چوکے لگائے، اس طرح وہ ایونٹ میں سب سے زیادہ 64 چوکے لگانیوالے کھلاڑی بن گئے۔ کپتان کے پویلین لوٹ جانے کے بعد بھی محمد حارث نے اپنی اننگز آگے بڑھائی اور 54 گیندوں پر 85 رنز کی عمدہ اننگز کھیل کر باؤنڈری لائن پر کیچ آؤٹ ہوگئے۔ ٹام کوہلر صفر، عامر اجمل 1 رنز بناکر پویلین لوٹے جبکہ بھانوکا راجا پاسکا 25 رنز کے ساتھ ناقابل شکست رہے۔

لاہور قلندرز کی طرف سے زمان خان اور راشد خان نے 2،2 جبکہ کپتان شاہین آفریدی نے 1 وکٹ حاصل کی۔ قلندرز نے ناقص آغاز کیا اور دوسرے ہی اوور میں تجربہ کار بلے باز فخر زمان صرف 6 رنز بنا کر عظمت اللہ عمرزئی کی گیند پر آؤٹ ہوئے۔ مرزا بیگ نے پہلے ہی اوور میں بہترین کھیل کا مظاہرہ کیا۔ اپنا پہلا میچ کھیلنے والے احسن حفیظ نے دو چوکوں اور ایک چھکے کی مدد سے 15 رنز بنائے اور اسکور 38 تک پہنچایا۔

وہاب ریاض نے احسن کی وکٹ حاصل کرکے قلندرز کو دوسرا دھچکا دیا۔ عبداللہ شفیق نے بڑی اننگز نہیں کھیل پائے تاہم مرزا بیگ کے ساتھ مل کر اسکور 68 رنز تک پہنچایا۔ قلندرز کو تیسرا نقصان 10 گیندوں پر 10 رنز بنانے والے عبداللہ شفیق کی صورت میں اٹھانا پڑا, مرزا بیگ نے ذمہ دارانہ بیٹنگ کی اور جب ٹیم کا اسکور 13 اوورز میں 119 رنز پر پہنچا تھا تو عامر جمال کی گیند پر آؤٹ ہوگئے۔

نوجوان بلے باز نے 42 گیندوں پر 7 چوکوں اور 2 چھکوں کی مدد سے 54 رنز بنائے۔ سیم بلنگز اور سکندر رضا نے اس موقع پر اچھی شراکت کی اور ٹیم کو جیت کی راہ پر لے آئے- سیم بلنگز کی 28 رنز کی اننگز کا خاتمہ سلمان ارشاد نے 161 کے اسکور پر کیا اور اس وقت اننگز کے 17 ویں اوور کی پہلی گیند تھی۔ سکندر رضا نے ایک مرتبہ پھر لاہور قلندرز کے لیے 14 گیندوں پر 3 چوکوں کی مدد سے 23 رنز کی اچھی اننگز کھیلی لیکن وہ میچ ختم نہیں کرپائے۔

عظمت اللہ عمرزئی نے 18 ویں اوور کی چوتھی گیند پر سکندر رضا کی وکٹ حاصل کی تاہم قلندرز کا اسکور 161 رنز ہوچکا تھا۔ ڈیوڈ ویزے اور کپتان شاہین شاہ آفریدی نے ایک اوور قبل ہی ٹیم کو فتح دلا کر فائنل تک پہنچادیا۔ لاہور قلندرز نے 19 ویں اوور کی پانچویں گیند پر 6 وکٹوں پر 176 رنز بنا کر پشاور زلمی کو 4 وکٹوں سے شکست دی۔ شاہین شاہ آفریدی 11 اور ڈیوڈ ویزے 9 رنز بنا کر ناقابل شکست رہے-